पछ्यौरीमा अल्झिएको मन

तिमीलाई शहर पठाउन

म टाढासम्म आएँ

अनि, फर्कने बेला

सुटुक्क आफ्नो मन

तिम्रो पछ्यौरीमा अल्झाइदिएँ

तिमीले पनि त

चाल नपाएजस्तो गर्‍यौ

र, सवैको आँखा छलेर

त्यसलाई छातीमा टास्यौ

प्रिया,

मेरो मनलाई

सम्हालेर राख है!



हो,

मलाई थाहा छ

बाटाहरु सजिला छैनन्

साँघुरा गल्लीहरुमा

तिमीले सामना गर्नुपर्ने

साँघुरिएका मनहरु

अनि,

एकोहोरो तिमीतर्फ केन्द्रीत

तिनका कुटिल नजर....



पक्कै पनि

बाटाहरु सजिला छैनन्



तर प्रिया,

म त मन बाँच्छु

आँखाले होइन

मनले हेर्छु

कानले होइन

मनले सुन्छु

मस्तिष्कले होइन

मनले सोच्छु

बाहिरवाट हेर्दा

जस्तो देखिएपनि

वास्तवमा

म एउटा मन हुँ

......मात्र मन

र,

अहिले त्यो मन

तिम्रो पछ्यौरीमा

अल्झिएको छ

प्रिया,

त्यसलाई

सम्हालेर राख है !

Bibhor Baral